पहाड रुन्छ थर्किदै हिमाल रुन्छ भोकमा
विदीर्ण शैल टाकुरा मधेश डुब्छ शोकमा
छ पेट रिक्त सर्वदा अनङ्ग देह देखिने
छ राज्य नीति खै कहाँ, समृद्धि चित्र लेखिने ?।।१।।
नवीन रोग विश्वकै हुँदैछ आर्त सामना
छ घाउ भित्र निर्दयी अनन्त दर्द वेदना
कडा छ रोग फैलिने असङ्ख्य घात गर्दछ
छ भीड स्वास्थ्य गेहमा अकाल मृत्यु पर्दछ ।।२।।
जटीबुटी यहीँ छ खै निको हुँदैन रोग यो
छ अन्न उब्जिने गरा हटेन तीक्ष्ण भोक यो
बढेर तीव्र ढुक्ढुकी चरक्क आँङ चर्कियो
उपाय छैन आयको दिमाग मन्द रड्कियो ।।३।।
बसौँ त भित्र भोकले भुँडी छ रिक्त दुस्मन
गरौँ त काम छैन क्यै न दिन्छ राज्य रासन
पुगेर माथि मस्त छन् सुतेर देश बिर्सिने
भएन भाग्य देशको भविष्य भव्य चम्किने ।।४।।
न देश हिँड्न सक्छ खै उठेर ठिङ्ग पाउमा
समस्त व्यक्ति अल्झिए पाउने शक्ति दाउमा
छ माथि सूर्य चम्किने उँधो छ अन्धकार यो
नदी बगे असङ्ख्य खै भएन तृप्त प्यास यो ।।५।।